Logo
  De Paul Gilles
  
 
Qui sommes-nous ?

Contacts

Oeuvres

Liens



Lès copècias (5'27)

(Meux - Meû)

Quand v's-alez à l'èglîje, rawaîtîz l' corâl alumer lès grandès tchandèles di l'auté avou on longu èt nwâr mantche di bwès. Su li d'bout, i gn-a one dobe èmantchûre : on guide po fé passer l' mètche qui va sièrvu po-z-alumer lès tchandèles, èt one pitite capuche, li stofwè, qui c'èst po lès disténde. Li mètche qui dj' vos cause si lome mètche d'auté ou copècia ; è francès : rat de cave. C'èst come one pitite cwade di coton rèvolpéye dins dé l' cire. Si fôme èst ronde èt èle pout fé aviè 5 milimètes di diyamète. Come i gn-a one résèrve tournéye su li d'zeû dé mancthe, on l' satche à fait qu'on 'nn' a dandjî.

Li 2 d' fèvri, po l'Èglîje, c'èst l' djoû dé l' fièsse dé l' purificâcion d' l'Aviérje Marîye. Li c'mincemint di ç' pratique là, rimonte au Vin.me siéke. L'Èglîje dit qui, d'après li lwè dès Jwifs, lès feumes divin' présinter leû-z-èfant au tempe quarante djoûs après yèsse vinu au monde. C'èsteûve one sôrte di ramèssemint, si vos v'loz.

Li 2 d' fèvri, c'èst l' Tchandeleûse, li "fièsse dès tchandèles", dijeûve-t-on co bén. Ci djoû là, dins l' timps, li curé bènicheûve lès copècias. Pus près d' nos, li 2 d' fèvri, on bènicheûve lès tchandèles èt fé l' porcèssion aus tchandèles è l'èglîje, po s'atirer lès grâces dau Sègneûr. Lès copècias bènis, vos lès p'lîz acheter à l' pîce à l' sôrtîye di mèsse. Nos djins waîtîn' ça come on pôrbouneûr. On côp rintrés è leû maujone, à l' tchaleûr èt ratinris, nos tayons donîn' one fôme aus copècias.

I-z-è fyîn' dès crwès di totes lès sôrtes, sémpes, dobes, rabiazîyes avou dès croles au d'bout dès brantches, en fôme di svastikas, èt' cétèra... Vos-è vèyîz ossi dès toûrnés à spirale, èt à places qu'i gn-a, tot ç' qu'èsteûve à croles, i lès faleûve toûrner dins l' sins' dès-awîyes d'one monte ou come li solia : dins l' contraîre sins', ça p'leûve pwârter maleûr. I lès mètîn' aus-intréyes dès maujones èt dès stauves. Dins lès-anéyes 40, on-è vèyeûve co dins dès vîyès maujones dau XIX in.me siéke. II èstîn' aclapés su lès chambrans dès-uchs èt, à l' longue dès-anéyes èt dé l' coleûr qui lès rascouvyîn', vos-arîz dit qui l' bwès aveûve sitî sculté. C'èsteûve parèy su lès djivaus dès tch'minéyes. Tot ça po ténre lès sôrcîres lon èri dé l' maujone èt l's-'èspêtchî dé taper on mwaîs sôrt aus djins èt aus bièsses. Nos tayons crwèy'in' qu'i sèrîn' garantis dès maladîyes, dès maleûrs èt dès mwaîs sôrts èt qu' lès mwaîs-èsprits ni passerîn' pus. C'èsteûve co one manière di s' garanti conte li feu èt lès mwaîs faîts di l'alumwâre.

Divant 1909, qu'a stî l' dêrène anéye dè tiradje au sôrt, lès momans dès djon.nes-omes qu'alîn' tirer, alumîn' li copècia èt-z-è lèy"i tchaîr saquants gotes dins l' doblûre dé l' casaque dé l' gamin po qu'i tiruche on bon numéro. On pormwinrneûve ossi one tchandèle bènite clins lés places dé l' maujone ou su lés têres po lés rapurer. On-alumeûve lès bènitès tchandèles dè l' Tchandeleûse quand on-èfant v'neûve au monde ou l' mète è l' mwin d'one saquî qui fieûve sès dêrènes bauyes, po qu'i "passe" aujîyemint.
Come dins totes lés-ûsances, i gn-a dès p'tits candjemints qui s' faîyenut solon l' viladje ou l' rèjion qu' vos d'mèrez. Insi, li pratique à l' sôrtîye di mèsse, c'èsteûve dè glissî l' pîce au maurlî qui lèyeûve tchaîr one gote di s' copècia dins l' calote dès-omes ou dins l' bôrd d'en d'dins dès cotes dès coméres, ça pwârteûve bouneûr.

Dj'a lî on côp qu'au XVII in.me siéke, aus-ètèremints, lès djins passîn' à l'ofrande avou dès finès tchandèles qu'on lomeûve copècias. II èstîn' payis pa l' famile èt cit-ûsance là a duré jusqu'à l' fén dè l' XIX in.me siéke.

Paul GILLES, R.N.

-corâl : enfant de choeur
-ramèssemint : relevailles
-pôrbouneûr : porte-bonheur, fétiche
-rabiazîye : rendue plus belle
-svastika : symbole sacré de l'Inde en forme de croix à branches coudées croix gammée emblème des nazis
djivau : tablette de cheminée
-alumwâre : éclair
-rapurer : rendre plus pur, assainir
-maurlî : marguillier, chantre, clerc


Retour à la liste des textes de Paul Gilles